Hercklekoty, endorfiny i lotanie za chopem – Świynto Zakochanych na Ślonsku... po ślonsku
Opublikowane w czw., 05/02/2015 - 08:33
Som my ogromnie radzi, że w tym roku dziyń świyntego Walyntego, kiery jak kożdy wiy, je patronym od tych pofyrlanych i zakochanych, trefio genau na koniec tydnia. Skirz tego bydzie u nas na Ślonsku pora imprez do szportowców. No ja dlo tych zakochanych, ni dlo chorych... chocioż tak po prowdzie zakochanego od pofyrtanego odrożnic malo gdo poradzi...
Kożdy, co ze swojom libstom abo szacym loce, bydzie móg lecieć abo szlapać podle „nordic walking”-sztylu. A jak drugo połowica nie loce? No toż nojwyższy czas, coby zaczła. Od biydy możecie też pojedynczo wysztartowac. Kozdy coś dlo sia znojdzie.
Zakochani poznac po hercklekotach... lotani działo podobnie! Jak weznymy te dwa dokupy, to momy Parkowe Hercklekoty, czyli bieg walentynkowy w Parku Śląskim.
Organizuje to MK Team, kery juz znocie, że fest piyknie przigotowoł I bieg na Mikołoja w Parku Ślaskim. – Moc ludzi sie już pytało, kiedy zaś bydymy lotać i godali, coby co na Walentynki zrobić. A nom styknie pedzieć roz! – prawi Klaudia Kapica, połowa MK Team. – Biegów na Walentynki je po somsiedzku pora, ale mianujom sie dosc anfachowo. My chcymy, coby nasza impreza była inakszo od inkszych. A że oba my som Hanysy i miewomy hercklekoty, toz wszystko pasuje, pra? W parku idzie se polotać, abo pojeżdzić na kole, ale idzie się tu tez zolycić. A hercklekoty to je, jak serce pierońsko wartko klupie.
Ale jak nimocie jeszcze hercklekotow, to i tak mogecie sie u nas przelecieć i nie trza tu lotac w porach. - Kożdy loce som a do przelecynio abo przynścio je 5 km. Yno dejcie pozor, to wcale nima tak laps – prawi drugo połówka MK Team, Marek Witor – Chcielimy coby trasa była nie yno po asfalcie. Kole 60% bydzie trocha abo trocha bardzij pod kympka. Je tu duzo lasa i nikandzi nima szyroko, beztoż trza doważ pozór, jak sie leci. Skirz tego nie mogymy tam puścić za dużo ludzi. No i MK Team stawio na jakość a nie na ilość. Ale nie starejcie sie, jak jeszcze trocha potrynujemy, to zorganizujemy maraton jak w Nowym Jorku – śmieje sie.
Ci, co polecom, dostanom piykny herc-medal, grochowa i szolka tyju. Od Warsztatu Koszulkowego momy tez limitowano edycja rychtyk gryfnych triczkow na Pakowe Hercklekoty.
Sztart: 14 lutego o 12:00 w Parku Śląskim (Leśniczówka Rock’n’Roll Cafe)
Gdo rod pośpi i woli lecieć dopiyro po połedniu, może przijechać do Gliwic na Walentynki-Endorfinki. Tu nazwa wziyna sie od endorfin, kere powstajom i jak sie mo kogo rod i jak sie loce. Beztoż zapraszomy przede wszystkim zakochanych, ale nie yno. Organizator Maciej Stodolak pado: - Lecieć mogom wszyscy, nie trza mieć do tego pory!
Ale jak gdo pora już mo, to bydzie dodatkowy szpas – Pory polecom swionzane szlajfkom z serduszkiym i trza dać pozór, coby sie po drodze nie rozmatlac. A na koniec możecie sie dokupy fotka zrobić u profesjonalnego fotografa.
Medal też bydzie specjalny, bo uheklowany. Kozdy gdo choć roz zrobi kółko 2,5 km to go dostanie – Trasa je lekko i fajno, po równym. Po asfalcie ale bez aut – prawi organizator – Możecie lecieć jedno abo dwa kólka, maksymalnie 5 km. Chcielimy przekonać do lotanio mieszkanców Gliwic no i zatkać też dziura w kalyndorzu, bo podty jeszcze w Gliwicach nie bylo okolicznościowej imprezy dlo lotających.
Ale nojlepsze je, że nagrody dostanom nie ci, co przilecom najwartciejszy, abo bydom szumnie przebleczoni, ale te pory co som najdługszy dokupy. Eli ślubni, narzyczyni abo galany, to je jedno. Gdo sztartuje?
Sztart: 14 lutego o 17:00; Gliwice, Wyższa Szkoła Przedsiębiorczości
Klub lotających z Wodzisławia tyż o zakochanych pomysloł. I to ganc szprytnie, bo robiom impreza dziyń po, coby żodnymu w galaniyniu sie nie wadzić. Bydom rozmaite konkurencje, dlo tych co lotajom abo chodzom z „krykami”, w porach i samymu, kożdymu cosik – prawi organizator Zbigniew Marszałkowski – Bydzie tyż morsowanie.
Nojprzód towarzyski bieg i marsz na 5 km. Bez ściganio sie, yno do szpasu. Potym bydom sie ścigac pory na 300 m. Tu już bydom nagrody dlo najwartciejszych, ale kożdy gdo poleci dostanie geszynk – dwa zamatlane serca, co se idzie na bifyj postawić. Mozecie se obrać nawet 3 konkurencje, np. nordic walking, bieg w porach i morsowanie. Bydzie też dodatkowy szpas – prawi organizator ale nie chce padać, o co sie chechle. No i jeszcze przipomino, ze nie trza miec pory, coby móc lecieć – To je bieg do zakochanych a nie do por.
Sztart: 15 lutego o 10:00: Wodzisław Śląski (Gosław Sport Center)
A jak komuś jeszcze je mało, to tydzień pryndzyj może polotać po somsiedzku, „za granicom”, u Zagłebioków o IV Biegu Walentynkowym Dąbrowie Górniczej pisalimy TUKYJ.
KM
Serdeczne podziękowania dla dr Agnieszki Szkatuły za konsultację językową.
PS. Na kolejnej stronie znajdziecie naszą zapowiedż w wersji "do Goroli".
